寫．得盡

「大熱天時整雪糕糯米糍？！」 

「我哋整嘅你又敢唔敢做白老鼠？！」

今日，好友突然好有興致，話想整雪糕糯米糍，於是 call 埋同學 Y 嚟我屋企整呢樣甜品。同學 Y 就話想要個糯米糍嘅涵健康啲，所以就要藍莓、士多啤梨及椰果。

 
↑ 涵料

猶記得上年同媽媽試過整好多嚿糯米糍，整到我冇晒心機 (因為啲皮好易穿、又黐笠笠，包到我冇晒心機 ) …但今次整之前自己竟唔記得咗上次嘅經過，興致勃勃的預備架撐…

好友將任何材料工具都帶咗嚟我屋企，連電子磅都帶埋！ 真係服咗佢整嘢食嘅 passion！…我只係需要供應碗碟、餐具、榨汁機、爐、鑊、鑊鏟等等。同學 Y 就要比較遲到埗~ 

喺同學 Y 未到之前，我哋兩個就要先開工。

第一步—篩選、去除「定」部、仲要浸乾淨啲藍苺同士多啤梨。因為呢個要等待，所以我哋整住啲雪糕「粒」先。

第二步—用保鮮紙將每一小粒雪糕包好，然後放入冰箱等凝固，希望咬落去時係一粒的…呢個工序整到我哋兩個都厭，於是整咗大約廿幾粒之後，就去下一個步驟。

 
↑ 雪糕 + 雪糕 + ... = 廿幾粒

第三步—將士多啤梨切粒。呢個步驟係我最享受的呢！ 

第四步—榨汁！因為同學 Y 話想個皮係士多啤梨味，所以我哋就要唔知幾多克嘅士多啤梨汁啦。原來啲士多啤梨粒粒係有剩嘅，所以都會用埋嚟做涵。

第五步—篩粉加量度粉嘅重量。至於嗰啲係咩粉呢~ 我就唔知啦  我只係想快啲試吓今次嘅糯米糍好唔好食咋！

第六步—將所有材料混合為一，而嗰個製成品就係糯米糍嘅皮啦。印象中好似係將啲粉呀、士多啤梨汁呀、椰漿等食材都倒晒入鍋度… (應該仲有啲食材冇講啦~~ ) 由好友同埋同學 Y 扮演巫婆攪拌嗰啲「傑塌塌」嘅嘢。我就變身做咗清潔工！ 

第七步—當攪拌到啲「傑塌場」嘅嘢去到真係好「傑塌塌」嘅時候，就要搯返出嚟，然後喺碟上落少少油 (咩油都得) ，再攞去蒸。…同學 Y 話嗰啲「傑塌塌」嘅嘢似內臟嘅顏色同質感…  

↑ 內臟 

最後一步—就係包涵啦。我嗰頭幾嚿嘅糯米糍都係「生果糯米糍」。即係點呢？咪即係冇雪糕嘅囉。到後來我哋試下將一粒粒嘅雪糕包入去個皮、再加上椰果時，真係好唔掂—溶到漏出嚟呀！！！ 到最後啲雪糕唯有自己食返晒…講返啲糯米糍，聽聞士多啤梨係酸酸地 (但我又食唔到…又係味覺問題…) ，但呢個唔係最大問題。大家都覺得個皮先係問題。好友話下次都係唔好用士多啤梨嚟整。不過個皮對我嚟講咩時候都係個問題﹕因為我一直都唔鐘意糯米、食糯米糍嘅皮。食一粒都冇咩嘢嘅，食多幾粒就開始滯…  之後我離開咗整「糯米糍遊戲」，我終於都捱唔住啦！

↑ The melting point is so LOW!!  (朱古力雪糕)

 記．請媽媽食雪糕糯米糍—  啲雪糕漏晒出嚟，而我哋唔知道點樣解決嘅時候…我哋就放晒啲生果上去，務求令 呢一嚿嘢變得好睇啲 糯米糍好睇啲！當媽媽嚟到做 白老鼠 食評時，見隔離放有為同學 Y 裝嘅一杯水。但媽媽唔知道，問﹕

↑「杯水係咪俾我『朗』口架？」 

喺我離開咗個遊戲之後，佢哋就加返椰絲上去 (本身一直都唔想加椰絲，但最後都係加返，因為個糯米糍會黐住啲器皿；另一個原因係要嚿糯米糍好睇啲…) 。

如果可以選擇要唔要皮，我就會話唔要啦。我好想用朱古力薄脆代替「糯米皮」呀！！(咁就叫做「薄脆糍」) 

唔知道…我哋會唔會再有機會一齊整糯米糍？

唔知道…我哋研唔研究到改進方法？

唔知道…我哋可唔可以搵次成功整到雪糕糯米糍？

 
好友的

同學 Y 的

我的

 請你如實地回答：你仲敢唔敢食…【巫婆版】雪糕糯米糍走雪糕？！